星期一, 5月 16, 2011

失驚無神遊沖繩 - 人肉導航

籌備了整年的東北追櫻之旅,隨著一場驚天動地的大地震而煙滅。因為一個旅行社的促銷廣告,又重新燃點起,「我想去日本」的念頭,於是,氹了大寶取了兩天大假,趁五一勞動節假期,就在九州和沖繩之中選一個地方來個五天短線遊,結果,大寶竟然選中沖繩,其實私底下我只想去九州啊!

這個行程基本上沒有花過甚麼心思和時間去預備,買了香港航空的套票,再在網上訂下另外兩晚的住宿,及幾經艱辛下,問了三間租車公司,才可以在日本黃金假期這個超級檔期中,租到一架可以連開三天的車,以為一切已準備就緒,可以出發了。

第一天下機後,取過這部Demio,行完Outlet,打算到今晚入住的酒店check-in。



當我輸入酒店的電話號碼後,導航系統竟然打出沒有這個登記!它只能提供附近區域作參考。死!我只粗略看過這間套票提供的酒店地圖位置,它附近有甚麼建築物,我一無所知。我們依著導航走進市區,車子不斷在市中心內兜圈子,也曾下車問過幾間Lawson的店員,就是沒人知道這間Hotel Bizfort Naha的位置。時間一秒一秒地過去,找了大半個小時也找不到,天開始黑了,我惟有使出最後一度殺手鐧,跳下車子,走上一部計程車,請司機叔叔做領航員,帶著大寶的車子到酒店,原來酒店就在隔一條街,屋頂上有一大個霓虹燈招牌,走路的話也不用五分鐘,怎麼我兩個糊塗蟲就是看不到。
之後,問過酒店職員,方知道沖繩這邊的導航系統,多數用上map code,難怪我會撞板了!

13 則留言:

  1. 其實日本黃金週檔期,街上是否很多車?

    回覆刪除
  2. 坐的士導航 - 絕,劉太咁都諗到!

    下次唔好俾老公咁多選擇,只說「我想去九州」好了 ^^

    回覆刪除
  3. 咦 ~~ 架車好似我架喎 ~~~ :p

    搵的士導航係駕駛者既終極方法,哈哈!

    其實用 map code 係穩陣啲既,而且係趨勢,不過好多舊款既 GPS 係無,所以我會儘量搵定電話號碼同 map code 以妨萬一。

    回覆刪除
  4. I. minor,
    何只多車塞車,所有旅遊熱點都塞滿遊人。
    我們去美之海水族館時,要將車泊到去第七個停車場ge頂樓,係咪好誇張呢!

    大頭仔,
    係啦!其實當時真係好徬徨架,不過,見過有兩間東橫Inn就係附近路段,有想過真係搵唔到,就走入去投宿算數架~

    小頭,
    下次我一定唔會咁民主,畀佢揀!

    意粉,
    呢間車好吖~
    好揸又夠力~
    Map Code係好,但要查就較麻煩嘛~
    電話號碼就一開網頁就有。呢個絕對係個教訓,黎緊暑假的北海道之旅,我一定會好好預備這些資料嘞~

    回覆刪除
  5. 去北海道, 就更加要 MapCode, 好多地方景點都唔可以用電話搜尋的. 一定要出發前做好功課

    回覆刪除
  6. 之前晌沖繩駕車都遇著個反應遲鈍同唔update既navi,行左好多冤枉路......

    回覆刪除
  7. 係呀 ~ 上次我去北海道真係好多地方用電話號碼搵唔到,因為好多景點既電話其實係啲觀光協會之類既,連富良野間民宿可能太偏僻都搵唔到,結果係打電話去求救,晌富田農場等民宿主人黎導航。

    記得晌 ec2 見過有人貼搵 map code 果啲 site 出黎,同埋專門 for ドライブ果啲旅遊書都會印埋 map code。

    回覆刪除
  8. Jackson,
    見過鬼仲唔怕黑咩~

    師姐,
    我記得,前一排我又返睇過你個北海道遊記添。
    係喎,旅遊書都有map code喎,無留意到添!多謝你提醒我!

    回覆刪除
  9. Roy,

    我ge遭遇咪同你一樣!
    明明個路牌係叫我地直去,個死人GPS就叫我地轉左,好嘞跟住佢行,佢行行吓就無晒景,hang咗係度,激死!

    回覆刪除
  10. 呢d野邊難到你吖,俾我就聽瞓街都得嘞~^0^

    要唔要借北海道旅遊書過你呀?

    回覆刪除
  11. 你無買drive沖繩書咩, 入面有mapcode, 駕車必備喎~

    通常d navi晌轉彎前7百米, 3百米都有指示, 但我果次晌沖繩用果部就好多時都就轉先顯不, 又成鬼日要load data, 好56k年代......

    回覆刪除
  12. Maymay,
    你點使瞓街吖!安哥點都死番間房返黎畀你瞓啦~
    唔使借書畀我嘞~
    我買咗幾本日文版,應該都足夠嘞~

    Roy,
    無買到沖繩drive,我一路諗住,我都係去啲大路地方,去到機場拎張map又或者單張、小冊子咁,點知個國際機場咁dry先得ka~
    我架導航都唔好得你個架幾多,咪又係行行吓要search資料,驚青的ge話,一係就撞車,一係就心臟病發。
    其實個導航係咪要定期去update架?

    回覆刪除